అనుకున్నదే జరిగింది. ఎప్పుడెప్పుడా అని ఎదురుచూస్తున్న ఎన్నికల షెడ్యూల్ రానే వచ్చింది. ఇవాళ మధ్యాహ్నం నుంచే కోడ్‌ అమల్లోకి రానుంది. కొత్త పథకాలు, ప్రారంభోత్సవాలకు బ్రేకులు పడినట్టే. కేవలం ప్రచారం చేసుకోవడమే తప్ప జనాలకు తాయిలాలు, పథకాల లబ్ది చేకూర్చేందుకు దారులు మూసుకుపోయాయి. ఇంతకు ముందే ప్రవేశ పెట్టిన పథకాలు అమలు చేయవచ్చు. కానీ అవీ అమలు కాకుండా అడ్డుకునే ప్రయత్నం జరుగుతుంది. దీంతో ఎన్నికల కమిషన్‌ జోక్యం చేసుకోవడం, వాటిని ఆపేయడం చేస్తుంది.
దీంతో జనాలకు ఇక ఎన్నికలే తప్ప .. పథకాల అమలు ఉండబోదు. కళ్యాణలక్ష్మీ, షాదీ ముబారక్‌ మాత్రం అందే అవకాశం ఉంది. ఇప్పుడు చర్చలోకి వస్తున్న పథకం.. దళితబంధు. మొదటి విడతగా తూతూ మంత్రంగా కొంత మందికి ఇచ్చి దీనిపై పెద్ద ప్రచారం చేశారు. రెండో విడతకు లిస్టు రెడీ అయ్యింది. ఎంక్వైరీ పూర్తయ్యింది. కలెక్టర్‌ వద్ద ఫైనల్ లిస్టు చేరింది. కానీ ప్రభుత్వం నిధులు మాత్రం విడుదల చేయకుండా జాప్యం చేసింది. ఎన్నికల షెడ్యూల్ విడుదలవుతుందని కేసీఆర్‌కు తెలుసు. ఎందుకు మరి దీన్ని పెండింగ్‌లో పెట్టాడు. నిధుల లేమీ ఒక కారణం కాగా.. ఒకవేళ రెండో లిస్టు ఇస్తే చాలా మంది రాని వాళ్ల నుంచి వ్యతిరేకత వస్తుంది. దీంతో ఇది పెండింగ్‌లో పెట్డడమే మేలనుకున్నారు. ఎన్నికల షెడ్యూల్ విడుదలై.. కోడ్‌ అమలులోకి వచ్చిన నేపథ్యంలో ఇప్పుడు దళితబంధు ఇస్తామని ప్రకటిస్తారు.
కానీ దీన్ని ప్రతిపక్షాలు అడ్డుకుంటాయి. ఎందుకంటే ఒక్కొక్కరికీ పది లక్షల చొప్పున దళితబంధు ఇవ్వాల్సి ఉంటుంది. ఇది పెద్దమొత్తం కావడంతో నియామవళిని ఉల్లంఘించినట్టేనని ప్రతిపక్షాలు ఫిర్యాదులు చేస్తాయి. ఎన్నికల కమిషన్‌ జోక్యం చేసుకుని దీన్ని అడ్డుకుంటుంది. చూశారా..! మేం ఇస్తామంటే వాళ్లే అడ్డుకుంటున్నారు. మేం మళ్లీ ప్రభుత్వంలోకి రాగానే వెంటనే అందరికీ దళిత బంధు ఇచ్చేస్తామని ఓ హామీ అలా ఇచ్చేస్తారు. ఇలా తమకు ఎన్నికల్లో లబ్ది చేకూరే వ్యూహంలో భాగంగానే బీఆరెస్‌ దళితబంధు రెండో విడత ఇవ్వలేదని తెలుస్తోంది. గృహ లక్ష్మీ స్కీమ్‌ కూడా అంతే. కొందరికి కొన్ని చోట్ల ఎంపిక చేసి ఇచ్చారు.చాలా మందికి పెండింగ్‌లో పెట్టేశారు. కాంగ్రెస్ ఇదే పథకానికి ఐదు లక్షలు ఇస్తానంటుంది. ఇది బీఆరెస్‌కు దెబ్బ పడేలా ఉంది. అందుకే బీఆరెస్‌ మ్యానిఫెస్టోలో ఐదు లక్షలకు పెంచి.. తాము అధికారంలోకి రాగానే ఐదు లక్షలు ఇస్తామని ప్రకటించేస్తారు. దీంతో పాత గృహలక్ష్మీ మరిచిపోతారు. కొత్తదాని కోసం వేచిచూస్తారు. ఇలా.. ఈ రెండు పథకాలు బీఆరెస్‌కు మేలు చేసేలా ‘కోడ్‌’ను తమకు అనుకూలంగా మలుచుకోనుంది బీఆరెస్‌.