మ‌రో మంత్రివ‌ర్గ విస్త‌ర‌ణ లేదు..! కీల‌క శాఖలు సీఎం చేతుల్లోనే..!! హోం, విద్యా, మున్సిప‌ల్ శాఖ‌ల‌పై ప‌ట్టు సాధించే దిశ‌లో రేవంత్‌.. విద్యా శాఖ‌పై తొలిసారిగా లోతుగా రివ్యూ.. అధికారుల‌కు ప‌లు కీల‌క సూచ‌న‌లు..

(దండుగుల శ్రీ‌నివాస్‌)

మ‌రో మంత్రివ‌ర్గ విస్త‌ర‌ణ‌పై ఆశ‌లు వ‌దులుకున్నారు. అది ఉండే ప‌రిస్థితులు కూడా క‌నిపించ‌డం లేదు. మూడు బెర్తులు ఖాళీగానే ఉన్నాయి. అవి భ‌ర్తీ చేస్తామ‌ని చెబుతున్నారు. కానీ ఇప్ప‌ట్లో అది జ‌ర‌గ‌దు. మ‌రి ఎప్ప‌ట్లోగా జ‌రుగుతుంది…? ఆ ఒక్క‌టి అడ‌క్కు..! అంతే. కీల‌క‌మైన మూడు పొర్ట్‌ఫోలియోలు సీఎం రేవంత్‌రెడ్డి చేతుల్లోనే ఉన్నాయి. హోం శాఖ‌తో పాటు విద్యా, మున్సిప‌ల్ శాఖ‌లు త‌న వ‌ద్దే ఉంచుకున్నాడు సీఎం. తాలు, మామూలు శాఖ‌ల‌న్నీ మొన్న కొత్త మంత్రుల‌కు కేటాయించేశాడు. త‌న వ‌ద్ద ఉన్న ఈ మూడు శాఖ‌ల‌పై ప‌ట్టు కోసం సీఎం ప్ర‌య‌త్నాలు మొద‌లుపెట్టాడు.

ప్ర‌భుత్వ స‌ల‌హాదారుగా ఉన్న సీఎం స‌న్నిహితుడు వేం న‌రేంద‌ర్‌రెడ్డి ఓ రకంగా ఈ హోం శాఖ‌ను అన‌ధికారికంగా చూసుకుంటున్న‌ట్టున్నారు. సీఎంకు కూడా దీనిపై ప‌ట్టు కుదురుతున్న‌ది. ఇక విద్యా శాఖ సీఎం వ‌ద్ద ఉండ‌టంపై చాలా విమ‌ర్శ‌లొస్తున్నాయి. ఆయ‌న బిజీ బిజీగా ఉండి దీన్ని నిర్ల‌క్ష్యం చేస్తున్నాడ‌ని, ఆయ‌న‌తో ఈ శాఖ మెయింటేన్ చేయ‌డం కాద‌నే విమ‌ర్శ‌లు బాహాటంగానే ఉన్నాయి. కానీ ఆ శాఖ‌ను ఎవ‌రికీ కేటాయించలేదు సీఎం. విద్యాశాఖ విష‌యంలో గ‌త స‌ర్కార్ ఫెయిల‌య్యింది. ప‌లు ఆరోప‌ణ‌లు ఎదుర్కొన్న‌ది. స‌రిగ్గా నిర్వ‌హించ‌లేక‌పోయింది. కేసీఆర్ స‌ర్కార్ ఓట‌మిలో అది కూడా ఓ ప్ర‌ధాన భూమిక పోషించింది. అందుకే రేవంత్ దీన్ని ఎవ‌రికీ కేటాయించ‌లేదు. త‌న వ‌ద్దే ఉంచుకున్నాడు. దీనిపై తొలిసారిగా శుక్ర‌వారం స‌మీక్ష నిర్వ‌హించాడు. అధికారుల‌కు ప‌లు కీల‌క సూచ‌న‌లు చేశాడు.