దండుగుల శ్రీనివాస్‌- వాస్తవం ప్రతినిధి:
రామన్న.. ఇంకా మారలేదు. పార్టీని మార్చే పనినీ ఇంకా భుజానికెత్తుకోలేదు. అధికారం ఉన్నప్పుడూ పట్టించుకోలేదు. ఇప్పుడూ పట్టించుకోవడం లేదు. పార్లమెంటు ఎన్నికలు సమీపిస్తున్న తరుణంలో హడావుడిగా మీటింగులు పెట్టి జాకీలు పెట్టి లేపే ప్రయత్నం చేస్తున్న పార్టీ వర్కింగ్ ప్రెసిడెంట్‌ కేటీఆర్‌.. జిల్లాల అధ్యక్షులను మాత్రం మార్చలేదు. నిజామాబాద్‌ జిల్లా అధ్యక్షుడెవరో తెలియదు. ఎందుకంటే గణతంత్ర వేడుకకు జిల్లాలో పార్టీ సీనియర్లెవరూ హాజరుకాలేదు. జీవన్‌రెడ్డి ఇటు వైపు రాలేదు. మాటలేదు ముచ్చటలేదు. ఓడిన ఎమ్మెల్యేలూ పార్టీ ముఖం చూడలేదు. బాల్కొండ ఎమ్మెల్యే, మాజీ మంత్రి వేముల ప్రశాంత్‌రెడ్డి తన నియోజకవర్గానికే పరిమితమయ్యాడు. ఇటువైపు రాలేదు.
కొత్త ఊపు తెస్తానని,మనమేం తక్కువ కాదని, మనదే మళ్లీప్రభుత్వమని, త్వరలోనే కేసీఆర్‌ను సీఎం చేద్దామని రోజుకో మాట మాట్లాడుతూ వస్తున్న పార్టీ వర్కింగ్ ప్రెసిడెంట్‌ తను కమిటీలు వేయకుండా కాలయాపన చేస్తూ భ్రష్టుపట్టించిన జిల్లాలను చక్కదిద్దే పనిని మాత్రం చేయడం లేదు. జిల్లాలో మొన్నటి వరకు బీఆరెస్‌కు రాజకీయంగా జిల్లా కంచుకోట. కానీ నాయకుల తీరు, కేటీఆర్‌ పట్టింపులేని తనం, కవిత కూడా పెద్దగా పట్టించుకోకపోవడంతో పార్టీ పరిస్థితి మరీ అధ్వానంగా మారింది. కవిత ఇక్కడ నుంచి ఎంపీగా పోటీ చేసే పరిస్థితి లేదు. అందుకే ఆమె కూడా ఇటు వైపు రావడం లేదు. కనీసం నేతలతో మాట్లాడటం లేదు. దీంతో జిల్లా బీఆరెస్‌లో అగమ్యగోచరం, అయోమయం నెలకొన్నాయి.