జర్నలిస్టుగా ఉన్న వాడికి విమర్శలే బలం ఎవరో ఏదో అంటారని భయమున్నప్పుడు నీ మెదడులోంచి జర్నలిస్టు అన్న ఆలోచన తీసేసి, ఈ వృత్తిని వదిలేసి అన్ని వదిలేసి ఇంట్లో కూర్చో…
మిగతా రంగాలలో రాణించినంత సులువు కాదు జర్నలిజంలో ఉండడం
24గంటలూ పణంగా పెట్టాల్సి ఉంటుంది…
అయినా కష్టానికి తగిన ఫలితం వస్తుందనే నమ్మకం ఉండదు.
కేవలం మనను నమ్ముకుని ఉన్నవాళ్లకు మూడు పూటలా అన్నం పెట్టగలుగుతున్నాం అనే చిన్న ఆశ తోనే ఇక్కడ నిలబడవలసి వస్తుంది అంతే…
చాలా మంది స్నేహితులుంటారు, మనల్ని ఉపయోగించుకునే వాళ్ళుంటారు..
కానీ ఒక్కరూ సహాయం చేసేవారు ఉండరు.
వెన్నుపోట్లు, కుటిల రాజకీయాలు అదనం.
వందల మందితో కలిసి పనిచేస్తున్నా ఎప్పుడూ ఒంటరితనం చిరాకు పెడుతూ ఉంటుంది…
సమయానికి ఆకలి వేయదు. ఆకలి వేస్తే తినడానికి సమయం ఉండదు. నిత్యం నీతో నువ్వు సంఘర్షణ పడుతూనే ఉండాలి.
అర్ధరాత్రి దాటినా నిద్దుర ఊసే ఉండదు కంటికి…
ఖాళీగానే కాలం గడిచిపోతున్నట్టు ఉంటుంది. కానీ,
క్షణం తీరికుండదు మనసుకు.
రోజూ కనిపించని శతృవుతో యుద్దం చేస్తూండాలి…
ఇవన్నీ తట్టుకుని నిలబడే వాడికి ఎంతో ఓపికుండాలి !
ఎంత సహనముండాలి !
ఎంత గుండె ధైర్యముండాలి !
ఇక్కడ బ్రతకాలంటే భయపడకు..
భయపడే వాడివైతే ఇక్కడికి రాకు…
అన్నింటిని తట్టుకొని నిలబడితే,
నీకు ఎదురు వచ్చే వాడే ఉండడు..
వచ్చినా, నీ మేధాశక్తితో నువ్వు ఎక్కడికో వెళ్లొచ్చు , ఉన్నత శిఖరాలు అధిరోహించవచ్చు…
ఎవడూ.. నేను జర్నలిస్టు అవుతానని అనుకోడు. తరగతి గదిలో టీచర్ అడిగినప్పుడు ఏ డాక్టరో ఏ ఇంజినీరో అవుతాను అని మనలో చాలా మంది చెప్పి ఉంటాం…
కానీ మనకు వేరే ఛాయిస్ లేకనో… ఛాయిస్ రాకనో…
వృత్తిలో ఆకర్షణతోనో…
ఈ వృత్తి లోకి వచ్చాము…
కాబట్టి ఇక్కడే ఉండాలి ఇక్కడే పోరాడాలి.
ఇక్కడ పోరాడి గెలిచేవాడు చాలా తేలికగా ప్రపంచంలో ఎక్కడైనా, ఎలాంటి పరిస్థితినైనా ఎదుర్కొని బతకగలడు. కావున, సమాజంలో మనకన్నా తోపు ఎవడూ లేడు.
🖋🖋🖋
ఓబలాషి లింగం గౌడ్
మెదక్ జిల్లా (అక్షరం ప్రతినిధి)